（神龙教基地）
（龙儿戴住金色皇冠拜见自己嘅师父）
师父：龙儿，点解？点解你潜入清宫嘅任务会失败？
龙儿：禀教主，龙儿系畀一个叫做韦小宝嘅狗贼所害嘅。
师父：佢呢个人武功好高咩？
龙儿：呢个人武功并非高强。
师父：佢用毒好叻？
龙儿：亦都唔系。
师父：唔通佢好风流潇洒，你畀佢嘅俊俏所迷！系咪呢？
龙儿：当然唔系，呢个人貌丑如猪，卑鄙如狗，系一个油嘴滑舌嘅坏蛋！
师父：噉你都会输畀佢？
龙儿：请教主责罚！
师父：呢啲就系命。韦小宝可能系你命中嘅克星。以后你见到佢，就要加倍小心！
龙儿：龙儿遵命！
师父：师父算到自己，我今日已经油尽灯枯。所以我要将教主之位传畀你！
（飞上围墙）
师父：龙儿，你速入血池！浸过血池水，你就回复真身，接任神龙教主之位。平西王世子即将上京见满清狗皇帝。你要贴身保护佢至好。
龙儿：系！
师父：我哋神龙教派三代辅助平西王爷吴三桂，而家传位于你，你一定要尽心尽力助佢登上王位。龙儿，我而家先入池，然后你再入。噉你就可以得到我毕生嘅功力！但系你要记住，我哋嘅门派武功独特，如果你失去咗处子之身嘅，噉你嘅功力十分之八就会过咗畀得到你童贞嘅人嘞！你要切记！切记呀！
（跳入池，龙儿相继跳入）
教众：神龙教主！惟我独尊！
龙儿：韦小宝，我一定会返嚟揾你嘅！
（丽春院）
龟公：喂！楼上楼下姑娘见客喇！
（韦小宝、多隆、……）
韦小宝：要揸篼呀要揸篼！
多 隆：屙凸就屙凸啦！
韦小宝：要揸篼呀要揸篼！
多隆：要揸篼呀要揸篼！
韦小宝：冚家铲呀！冚家铲呀！
多 隆：冚家铲呀！冚家铲呀！
韦小宝：要揸篼呀要揸篼！
多 隆：冚家铲呀！冚家铲呀！
韦小宝：冚家铲呀！冚家铲呀！
多 隆： 呢镬你重唔冚家铲？！
韦小宝：边个话我冚家铲呀？我大个家姐企喺度，你分明就诬捏上司，罚你十万两银！
韦春花：哎呀，细佬，多大人冇心架！你原谅佢啦！
多 隆：我冇心架！
韦小宝：啊？你咁帮住佢，莫非你哋有路？
韦春花：唔系呀，边个系啫？我哋好清白架！（揽多隆）
多 隆：我哋好纯洁！我哋好清白架！我哋好清白架哩！好清白，真系。
韦小宝（冇眼睇）：哎！冇眼睇你两个！屙涿尿先。（出去屙尿，见一婢女行过，主动搭讪）
韦小宝：靓女！
婢女：贱人！
（韦小宝畀两人失惊无神拉入间房）
阿珂：唔准出声！韦小宝呢个狗贼系咪响隔篱房？
韦小宝：啊？！系！啊，唔系！唔系！唔系！系！系！唔系！
阿珂：究竟系定唔系？
韦小宝：韦小宝同你有咩唔妥呀？
阿珂：韦小宝呢个狗贼，助纣为虐！天下人，人人得而诛之。
韦小宝：天开眼咯，我忍辱偷生咗咁多年，卒之等到今日，多谢你哋！
阿珂：你系？
韦小宝：我全家都系畀佢害死嘅！佢重迫我一定要我认佢做契弟！呢个狗贼，人人得而诛之！你哋快啲去杀咗佢，我烧定炮仗！
阿珂：咪住，带我哋去！
韦小宝：呢层梗系啦，等我执返对名贵眼镜先。嚟呀。
（韦小宝带路）
韦小宝：两位，请！
（三人步入房，多隆同韦春花坐喺床头。）
韦春花：我哋清白架！
*多 隆：我哋清白架，韦爵！
韦小宝：你个冚家铲唔好嘈！
多 隆：冚家铲呀！冚家铲呀！冚家铲呀！冚家铲呀！……呢次我冚家铲啦！
韦小宝：点到你唔认呀？韦小宝，我宜得食你嘅肉，煎你嘅皮，拆你嘅骨！
（韦小宝趁机退出房，两黑衣人埋去杀多隆。）
多隆：喂喂喂！搞咩呀？
阿珂：韦小宝！唔好话你死得不明不白。我就系独臂神尼嘅弟子！姓李名珂！
多隆：我系韦小宝？
（阿珂挥剑劈落，多隆闪避。）
多隆：救命呀！人嚟！救命呀！人嚟！救命呀！（走到大堂）
（韦小宝匿埋一二角）
韦小宝：做人嘅嘢唔使咁惊青嘅！定啲嚟呀！
多隆：好彩我班定马咋！
韦小宝：你梗要啦！咁多仇口！
（吴应熊同龙儿坐山观虎斗）
（阿珂畀削咗对帽，长发飘落。）
韦小宝（除低眼镜）：喂！女嚟㖞！咦喂！几好吓㖞！喂！不如——（搭住多隆膊头）
（多隆莲子茸噉嘅面口）
多隆：卑职明白！卑职明白！
（阿珂同师妹寡不敌众，卒之就范）
（上演英雄救美）
韦小宝：全部停手！
阿珂：你重唔走？冇命架喇！
韦小宝：放心！正话我唔知你哋真系反清义士！但到咗呢个田地，我冇办法唔表露我嘅真正身分。（除低眼镜）其实我就系射雕英雄嘅传人，东方不败嘅师父，西方失败！
众人（惊慌）：啊？西方失败？！
多隆（出场）：咦？你咪专门主持正义嗰个西方失败？哎，你唔好乱喐呀，你喐亲我就杀咗呢两个女仔！人嚟，畀毒酒佢饮！
手下：啊？毒酒？！
韦小宝（提佢）：喂！嗰樽咪系啰！
（手下扐起葫酒呈喺韦小宝眼前）
韦小宝：咩话？你……
阿珂：喂！唔好饮呀！
多隆：哈！唔好？佢一饮咗呢就会迷失本性，如果喺半个时辰内冇女人同佢上床嘅话，就会化为一滩血水而死！饮！
阿珂师妹：唔好呀！唔好饮呀！
韦小宝：我唔能够连累你哋嘅。（引颈饮之）
韦小宝：酒我饮咗嘞，放咗佢哋先！
多隆：哈哈！好！我哋走！
（多隆同班手下撤退）
韦小宝（坐低）：人渣！（扮肚痛）
阿珂：你点呀？
韦小宝：我毒发！救我！
阿珂：点救呀？
韦小宝：一定要有个后生嘅女人同我上床先可以解毒！唔得嘅！唔得嘅！
阿珂师妹：如果我哋两个……
阿珂：同西方大侠你……噉就可以救到你呀？
韦小宝：心领嘞！我唔可以噉做，你哋扯罢啦！快啲！
阿珂：侠士舍身相救，阿珂同阿南永感大德。你死咗之后我哋会烧啲嘢畀你架！（起身走）
韦小宝（拉住阿珂）：喂喂喂！哗！你由我死咁冇义气架！
吴应雄（同龙儿落楼）：呢啲下九流骗局呃得边个呀？小姐，你千祈唔好信佢呀！
阿珂：吓？！你！我哋走！（拂袖而去）
韦小宝：做架梁呀，僆仔你？人嚟！摷佢！
多隆：摷佢！
（龙儿一下就打低晒多隆啲手下）
（韦小宝同多隆支箭噉标出去，阿珂同阿南欲追去，畀龙儿阻住）
龙儿：穷寇莫追！
吴应熊：两位小姐冇事吖嘛？在下吴应熊！家父系平西王吴三桂！
阿珂：我叫阿珂呀。
阿南：师姐，师父话吴三桂系大汉奸。我哋同佢嘅仔来往，师父会责怪我哋嘅！
阿珂：我有分数。（拱手）多谢公子相救，后会有期！请！（出门）
吴应熊：哎，两位小姐！
龙儿：哎，唔好追嘞。你已经闯咗祸嘞！头先嗰个就系韦小宝。
吴应熊：吓？佢就系韦小宝？哈！
（韦小宝同多隆搞到哩咁唏）
多隆：哗吓！里便嗰条友武功咁高强嘅？
韦小宝：鳌拜够高强喇，一样畀我造瓜！返去班马！
（两卒骑马赶到）
一卒：卑职参见两位大人！
韦小宝：咩事呀？
一卒：皇上有旨，急召两位大人入宫。
（宫内）
韦小宝：皇上重未到嘅？
双儿：相公，你咁急叫我哋嚟做咩呀？
韦小宝：今日我喺街畀人掐！谂住阵间见完皇上同你两个出去覆啅！
双儿：边个咁大胆掐你呀？
韦小宝：哼！掐得到我嘅梗有返咁上下厉害啦！佢拳头大过砂煲！双眼有若铜铃！条脷牛脷咁长！高我成两个头！（见到龙儿喺面前经过）喂！僆仔，咪行住！（指龙儿）啊，个样就同佢差唔多，你两个行埋啲睇清楚！咦？乜越睇越似样，直情饼印一样添哩。
龙儿：乜我条脷有牛脷咁长咩？
韦小宝（打后褪）：哎呀！真系你个乸型？够胆踹入嚟我地头？喐佢！
（双儿唔够龙儿打）
韦小宝：你两个顶住先！我去班马！
画外音：皇上驾到！
双儿、韦小宝：叩见皇上！
康熙：平身！
（韦小宝走去康熙身边）
康熙：韦卿家，咩事呀？
韦小宝：皇上，（指龙儿）戴黑帽嗰条乸型擅闯禁宫，重企图“zong1”贵妃冲凉。我想话阻止都重畀佢殴打！
康熙：真有此事？
韦小宝：系哩。
吴应熊：韦大人，身受何职呀？
韦小宝：四二六！啊，唔系。吴多阁大学士兼鹿鼎公！呢位老世有咩指教？
吴应熊：你睇清楚我系边个！
（韦小宝耳语）
康熙：你话佢就系嗰个乸型嘅同党？韦卿家，你唔可以乱讲嘢！呢位系平西王吴三桂嘅大公子——吴应熊。今次入宫系同朕商议国家大事。
韦小宝（同吴应熊扼手）：小王爷真系气宇轩昂，实在闻名不如见面！
吴应熊：呢位龙兄系小皇旗下第一猛将，系我带佢入宫嘅。
韦小宝：猛将兄！猛将兄气宇轩昂，实在闻名不如见面！
龙儿：头先你话我乜嘢话？
韦小宝：我话阁下武艺高强，我对你嘅钦佩有如滔滔江水连绵不绝！
康熙（暂乱歌柄）：小宝，你无谓多讲，传令设宴！
多隆：得唔得呀？
韦小宝：得！
韦小宝（向龙儿敬酒）：猛将兄，细佬敬你一杯！刚才些少误会，一嘢抹咗佢哩？！请！（龙儿举杯）
韦小宝：小王爷，你有猛将兄呢啲噉嘅高手助阵，可谓战无不胜，攻无不克，就算打返嚟京师都赢硬呀！
吴应熊：你讲咩呀？想诬捏小皇作反呀？
韦小宝：哈哈哈！今日真系，好高兴呀今日真系！皇上，不如搞少少嘢嚟助吓兴哩？
康熙：揾啲嘢助兴都好嘅。你想搞咩？
韦小宝：猛将兄咁猛！我愿意出一百两，赌猛将兄喺十招之内打低我几个不成材嘅手下！
龙儿：噉又未必。
韦小宝：未必咩？噉我买多一百万两赌你打唔赢呀！
吴应熊（起身）：好，就赌一百万两！
韦小宝：多谢！
龙儿（起身）：世子！
吴应熊：你千祈唔好丢我架呀！
韦小宝手下：参加皇上！
康熙：平身！
韦小宝手下：谢皇上！
康熙：龙卿家，你可以开始！
韦小宝：一二三四五六七八九！重有一招！
吴应熊：龙儿，唔好丢平西王府架！（龙儿使出第十招）
韦小宝：第十……！
（啲手下尽数倒地）
吴应熊：死呀哩？多谢韦爵爷一百万两！（韦小宝目定口呆）
韦小宝：赌债肉偿，得唔得呀？
吴应熊：都好！
龙儿：微臣出手过重，请皇上恕罪。
康熙：龙卿家，拳脚冇眼，毋须自责。
龙儿：谢皇上！
康熙：趁今日大家咁齐全，朕有件喜事要宣布。朕经已决定将建宁公主许配畀吴卿家，招佢为驸马！以后大家就系一家人嘞！
吴应熊：谢皇上！
韦小宝（心语）：今日最开心都系呢个消息嘞。
康熙：韦卿家，朕就派你为钦差大臣，护送公主到云南。
韦小宝：啊？！谢主上！
康熙：你知道朕点解要赐婚吗？
韦小宝：皇上一定有原因嘅，小宝唔敢妄自猜测！
康熙：自从鳌拜正法之后，朕经已得到全国臣民效忠。只有一啲反贼，例如天地会嘅陈近南同埋明朝公主独臂神尼，一直同朕作对。
韦小宝：不过呢啲二打六应该玩唔出咩花样嘅。
康熙：朕重有一个心腹大患，一路令朕寝食不安！就系平西王吴三桂！
韦小宝：噉皇上重同佢做埋亲家？！
康熙：朕一直有卧底密报，话佢招兵买马，勾结神龙邪教。假太后嘅事就系佢派嚟嘅！
韦小宝：分明系想作反！
康熙：朕安排你做钦差大臣，你明朕嘅意思啦？
韦小宝：想借啲意做瓜佢？
康熙：当然唔系。一系唔杀，一杀要斩草除根！朕希望你依家用怀柔政策！安抚吴三桂！拖延佢作反嘅日期。等喺适当嘅时间，朕会调动兵马，将佢哋一网打尽！
韦小宝：微臣明白！
康熙：朕唯一担心嘅就系建宁公主呢个刁蛮女唔肯嫁。你去劝吓佢呀。
韦小宝：遵旨！
（建宁寝宫）
韦小宝（下跪）：韦小宝叩见公主！
建宁：平身！
韦小宝：谢你嘅公主！
建宁：福儿！禄儿！冇你哋嘅事嘞！
福儿、禄儿：系！（离去）
（建宁扭住韦小宝只耳）
韦小宝：哎呀！哎呀！扭死我咯！扭死我咯！
建宁：你个死嘢呀！死得你咁易呀？！你唔使嚟揾我架啦？
韦小宝：咪嚟咗啦。
建宁：算你嘞！
韦小宝：啊，恭喜公主！贺喜公主！有个天大嘅喜讯！
建宁：恭喜韦爵爷，贺喜韦爵爷，我都有个天大嘅喜讯要话过你知！
韦小宝：又有？！
建宁：你讲先！
韦小宝：皇上已经赐咗婚喇！
建宁：系？！
韦小宝：会将公主你许配畀……平西王吴三桂次子吴应熊。重派咗微臣做钦差大臣陪公主出嫁。
建宁：唔得架小宝！
韦小宝：何解呀？
建宁：因为我有咗你嘅骨肉啰！
韦小宝：吓得我腾腾震呀！
韦小宝：真系吓到我入心……！
建宁：噉而家点先得架？！
韦小宝：唉！今次大罪嘞！杀头有之嘅！
建宁：一系你同皇兄讲，将我改为许配畀你。至多我初一十五都唔打你吖。
韦小宝：咁着数？！
建宁：系呀！
韦小宝：唉！但系皇上金口已开！边有咁容易收得返呢？
建宁：我唔理呀！如果唔系，话畀皇兄听你强奸我！
韦小宝：哗！你掉返转头嚟讲都有架？！
建宁：一系噉吖，我照样嫁畀个吴应熊，重话个仔系佢嘅。但系你晚晚都要嚟陪我！
韦小宝：啊？噉都得？！我哋咪即系变咗奸夫淫妇！要浸猪笼架㖞！
建宁：噉你想浸猪笼定斩头吖？
（韦小宝一筹莫展）
（大队人马护送建宁上路）
（建宁唉声叹气）
某兵：禀皇上，已到十里亭！
康熙：传令落去，全军稍息！（同吴应熊讲）驸马，朕同你喺度休息。
吴应熊：系！皇上。
（韦小宝周身唔自在）
多隆（见韦小宝难以落马，走埋去帮手）：哎！哎！哎！韦大人，我嚟，我嚟。哗！韦大人，你今日着起呢件盔甲真系有型呀。卑职对你嘅景仰有如滔滔江水……
韦小宝：滔你老母！热到仆街，重要戴顶死人帽，头顶中箭噉款。小喇叭！
（十里亭内）
康熙：请！
吴应熊：系！
康熙：祝你一路顺风！
吴应熊：谢皇上！
康熙：朕敬你一杯！
吴应熊：饮！
建宁（嗌）：小宝！
建宁：好闷呀！
韦小宝：咩呀？
建宁：你上嚟扮龟呀。
*韦小宝：而家送你去嫁！扮龟？！你真系讲笑啫呢啲！
建宁：你重周围行？！我都系为你着想咋！成支避雷针噉，一阵间行雷呀实劈死你！
韦小宝：若果真系行雷呀，我系咪避雷针噉都系第一个劈我架喇！
建宁：噉又系！
韦小宝：攞去顶住先呀！怕咗你呀！（递咗条蕉畀建宁）
建宁（抌咗条蕉）：死人头！
韦小宝：全部企好！挺直啲！精神啲！
龙儿：韦大人，好威风㖞！
韦小宝：失礼！有我喺度呀，边个够胆喐皇帝一条毛呀？！
独臂神尼（从天而降，直冲康熙）：狗皇帝！
龙儿：护驾！
韦小宝：皇上小心！护驾！
康熙：护驾！
韦小宝：护驾！
康熙：护驾！
独臂神尼：寒冰掌！
独臂神尼：狗皇帝！
韦小宝：吞泡呀？！重唔护驾？做乜鬼？
龙儿：护驾！（ung2韦小宝出去）
（独臂神尼把剑顶住韦小宝胸膛）
龙儿：寒冰掌！
（韦小宝脱险）
众人：捉住佢！
康熙：小宝你冇事吖嘛？
韦小宝：好彩我有件天蚕宝衣喺底。皇上，你龙体无恙吖嘛？
康熙：小宝，今次你护驾有功，朕就封你为……护驾！（惊慌而逃）
韦小宝：保护皇上！保护皇上！保护皇上！
（啲人迫晒喺建宁嘅坐驾里面）
某兵：阿勇呀！
某兵：保护皇上！保护皇上！
康熙：你叫咩名？
某兵：我叫温兆伦呀！
康熙：返去诛你九族！
某兵：谢皇上！啊？
*建宁：一系唔上嚟，一系就咁多人上嚟！
韦小宝（某人只脚顶住韦小宝块面）：小喇叭！边个鞋都唔着呀？喂！后便唔好顶顶贡哩！喂！上便啲友唔好揸住我条嘢好吗？！
阿珂：咪住！大家都系身不由己架咋。
韦小宝：边个咁窜呀？！（抬头望）
阿珂：你个狗贼？！
韦小宝：我系呀！你好吗？
独臂神尼：喺噉嘅情形之下，我哋好难分高下。不如我哋用十成功力将啲人迫出去啦。
龙儿：好！
阿珂（揸住把刀）：攞你狗命！
（千钧一发之际，独臂神尼同龙儿运功将啲人迫晒出去，韦小宝逃过一劫。）
龙儿：皇上，你哋走先啦！
韦小宝：拍硬档送埋我走！唔该！
龙儿：一阵先啦！
（龙儿同独臂神尼大战，韦小宝左右闪避。）
韦小宝：重要等几耐呀，大佬？
韦小宝（安全着陆）：唔使送咁大力吓哗？！
（独臂神尼生擒吴应熊）
阿珂（捉住韦小宝）：狗贼！睇你走去边！
韦小宝：我冇所谓，你去边我去边。
独臂神尼：捉佢两个走！走！
康熙：你重唔去追？
龙儿：皇上唔使担心！卑职马上去救驸马！
建宁：救埋韦爵爷呀！
龙儿：神龙教众接令！即刻追截一个老尼姑同平西王世子！
（四人行于树林之中）
阿珂：做咩呀你？
*韦小宝：你把剑晾响前便，我个头必然系缩向后架嘛！
阿珂：你个无赖！信唔信我一剑杀咗你吖嗱？
（独臂神尼吐血，吴应熊想借机松人，畀独臂神尼打低）
阿珂：师父，你点呀？
独臂神尼：估唔到康熙身边有咁内力深厚嘅高手。莫非清狗气数未尽？！
韦小宝：使我帮手叫大夫唔使呀？
阿珂：想走？师父，韦小宝呢个奸贼，诡计多端。不如我杀咗佢先。
韦小宝：我想帮你哋啫。
独臂神尼：唔杀得！佢系康熙跟前嘅红人，而家已经系我哋嘅护身符。要杀就杀佢啦！（指住吴应熊）
吴应熊：唔好呀！唔好呀！阿珂小姐，嗰日喺丽春院系我救你架。你唔记得嘞咩？
独臂神尼：阿珂，乜你见过佢咩？
阿珂：嗰日我同师妹去查探，几乎畀韦小宝呢个奸贼呃到。好彩得呢位公子相救咋。
独臂神尼：点解你从来冇同我讲过嘅？
韦小宝：不过你漏咗样嘢冇讲㖞！呢位公子就系平西王吴三桂嘅大仔，打伤师太你嗰位高手就系佢嘅马仔！
独臂神尼：啊？呢个就系卖国贼吴三桂嘅仔？！同我杀咗佢！
吴应熊：唔好呀！唔好杀我！唔好杀我呀！
独臂神尼：师父嘅说话你都敢唔听？
（神龙教几个教众赶到）
吴应熊：救我呀！救我呀！我喺呢度呀！
教众：老尼姑，你好放人嘞㖞！
独臂神尼：有本事就嚟攞吖！
（教众围攻独臂神尼）
一教众：老尼姑一早受咗伤！唔使怕佢！上！（中枪）
（最后一个教众见势不妙，飞身离去）
韦小宝：能够死响我一阳指手下，都算系你嘅福气！（抌咗背后嗰支火枪）
韦小宝：晚辈正话斗胆用一阳指嚟助神尼你一臂之力。希望神尼唔好见怪！
独臂神尼：咩一阳指呀？火枪就火枪啦。你做咩要帮我？
（独臂神尼点咗吴应熊嘅睡穴）
阿珂：公子！
独臂神尼：你咁紧张做咩呀？我只系点咗佢嘅睡穴！你有咩即管讲啦！
韦小宝：请恕晚辈无礼！（除袜）
独臂神尼（见到韦小宝脚板上面“清明”二字）：清明？左脚“反复”，右脚“清明”。莫非你系天地会嘅人？
韦小宝：冇错！晚辈韦小宝正是天地会嘅青木堂堂主！呢个就系我嘅令牌！（喺腰间扐出一个令牌）家师陈近南派我卧底宫中，今日得见师太真系三生有幸！
阿珂：师父，唔好信佢呀！佢好狡猾架！
独臂神尼：令牌系真嘅！陈总舵主好吗？
韦小宝：有心！师父佢食得瞓得。重成日提起你老人家。话天下武功佢只系排第二，师太你先系排第一。重系抛离好远嗰只！哈哈哈！
独臂神尼：陈总舵主太夸张嘞！
韦小宝（突然跪低）：我想师太你收埋我做徒弟！唔知晚辈有冇呢个福气呢？
独臂神尼：韦香主，请起身啦！
韦小宝：若然师太你唔应承，我就一路跪到死为止！
独臂神尼：好嘞！
韦小宝（起身）：多谢师父！（同阿珂讲）师姐，我知你不留对我都存在有多少误解。不过我相信你好快脆就会明白。
独臂神尼：韦香主，我暂时收你为挂名弟子。等到陈舵主同意之后，我先正式教你武功！
韦小宝：多谢师姐！啊，唔系，多谢师父！
独臂神尼：此地不宜久留！我哋都系快啲离开呢度。前面重有位师姐喺客栈等紧我哋架。
韦小宝：好！
韦小宝：师父呀，请问独臂刀王系咪你老窦？
独臂神尼：唔系。
韦小宝：咦，有间客栈㖞。
独臂神尼：真系有间客栈㖞。
（客栈个名就系：有间客栈）
（多隆喺店内扮女人，啲男人见亲佢都呕一餐）
手下：多大人，点解成日“目及”住条麻甩佬呀？
多隆：嗰个女人嚟嘅。
手下：大人点知呀？
多隆：系男人行过见到我都呕啦。系佢一个唔呕嘅！一定系女扮男装！
手下：大人聪明绝世，下属对大人嘅景仰，有如滔滔江水……
多隆：吆你老祖！
（韦小宝一干人行入客栈）
阿南：师父！呢便呀！
独臂神尼（坐低）：唔该！
韦小宝：师姐，有事揾我呀？
阿珂：躝开！阿南，师父受咗伤。快啲同师父入房疗伤。
独臂神尼：阿珂，你喺下便揾间房睇住佢！小宝，你周围巡吓！睇吓有冇人跟踪我哋！
韦小宝：不过师父，（指住吴应熊）呢条友仔呢……
独臂神尼：我点咗佢聋哑穴，佢听唔到我哋讲嘢架！你放心喇！（走开）
韦小宝：哦。
韦小宝：师姐，我想同你表白一下咋！其实我本身嘅为人呢绝对唔……
阿珂：躝开。
（韦小宝冇好气噉走开）
（韦小宝撞到多隆）
多隆：韦大人！（韦小宝呕）
多隆：哗！韦大人，你真系男人中嘅男人，呕都呕得咁精彩嘅吓！
*韦小宝：多隆，你揾啲噉嘅嘢搞架你！
多隆：我哋嚟得快哩？！知道方圆十里净系得呢间客栈！所以伏喺度嚟救你呀！
韦小宝：使鬼你救呀？我一早已经昆掂个老师姑呀！之所以跟到嚟呢度！系想得到佢……
多隆：大人果然口味独特，老师姑都有兴趣。卑职佩服！佩服！
韦小宝：佩你个头！我系想得到佢嘅徒弟珂姑娘。有冇带我啲行装嚟呀？
手下（钻个头出嚟）：梗系有啦！连大人嘅沟女战衣都带埋嚟呀！
韦小宝：咦！呢条僆仔几醒目㖞！有前途！（接过战衣）
多隆（狂殴手下）：仆你个街呀！我只鞋你都争住擦？！
多隆：啊！实在太靓仔喇！大人，你嘅英俊不凡有如滔滔江水连绵不绝噉涌埋嚟。小人对大人嘅钦敬……
韦小宝：唔好成日对住我嘅阴茎好唔好呀？
*多隆：对唔住！大人，我预备咗啲好嘢帮得你手！
（三樽春药摆喺台面）
多隆：淫不风流枉少年！淫贱嫲嫲咸外父！淫那琵琶小喇叭！大人，呢三只春药当今世上……
韦小宝（扫晒啲春药落地）：都算最苴嘞！睇我啲呀，细佬！（扲出一樽嘢）
多隆：哗！乜家伙？
韦小宝：除咗天下第一淫药“奇淫合欢散”之外，“我爱一碌葛”实在可以称霸淫贱界。呢剂嘢莫讲话唔掂得！闻吓都唔掂呀！
多隆：咁犀利？！
韦小宝：试吓你就知！
（多隆揾手下较飞）
多隆：犀利成点呀？
韦小宝：顾名思义，呢剂嘢毒发嘅时候，中毒者就会对住啲条状或者碌状嘅物体嚟发姣！不停噉追住嚟索吻！无论你点样反抗，甚至乎奚落佢，或者毒打佢，佢都一样勇往直前，唔会放弃嘅！
多隆：哗！噉有乜解救呀？
韦小宝：好简单！只要用解药一喷，乜事都无！
多隆：咦，大人，睇嚟今晚珂姑娘都几难逃出你嘅手指罅。（韦小宝狂笑）
（吴应熊用只脚喺地下写咗“解穴”两字）
（阿珂大胆解咗吴应熊嘅穴）
吴应熊：阿珂小姐，不如你放我走先吖！
阿珂：唔得架！噉……师父会责怪我架！
吴应熊：系噉不如我哋一齐走吖！
阿珂：乜你咁放肆架！
吴应熊：我只系讲出我由衷之言啫。其实喺丽春院嗰日，我一见到你，已经对你一见倾心！无奈重未有机会向你表达啫。
阿珂：噉你又做驸马爷？！
吴应熊：唉，呢啲只不过系我父王嘅计谋。他日推翻满清，我父王登基大宝。我就系太子！我嘅夫人就系太子妃！话唔定，好快会变成皇后添！
阿珂：噉关我咩事㖞？
吴应熊：唔通噉你都重唔明白我嘅心？我心里便除咗你，再冇第二个！（阿珂嗒晒糖噉款）只有你，先至有资格做我皇后！
（韦小宝推门入嚟）
韦小宝：师姐，点呀？呢个狗贼冇咩古怪吖嘛？
阿珂：有我喺度呀，佢有咩古怪出呀？
韦小宝：有道理！（见到地下有两个字）咦？！点解有两个字写咗响地下度架？啊？哗！重写得咁肉酸！（指住吴应熊）系咪你写嘅？讲！系咪？哦！你死喇！
阿珂：佢……
韦小宝：师姐，静静鸡话我听，呢两个咩字？我唔系好识字。
阿珂：系“咪喐”两个字啰。我写畀佢睇嘅。
韦小宝：哦。（偷偷地糁啲“我爱一碌葛”喺张凳上面）师姐，你企咗咁耐都应该攰哩。等我担张凳你坐吓先啦。
独臂神尼（坐咗张凳）：唔该。
韦小宝：师父你……
独臂神尼：做咩呀？
韦小宝：冇乜嘢吖嘛？
独臂神尼：我冇嘢，我已经运功将啲内伤迫咗出嚟！
韦小宝：唔系，即系……你真系冇嘢？
独臂神尼：唔好讲咁多，你出去先喇！我哋几师徒有啲嘢要讲！
韦小宝：哦！（转身走）
独臂神尼：咪行住！
韦小宝：师父，你想点呀？
独臂神尼：你真系查清楚冇敌人跟踪我哋？
韦小宝：应该冇。
独臂神尼：噉你出去啦！
韦小宝：好。
（独臂神尼中招）
多隆：咩事呀？
韦小宝：神尼中咗“我爱一碌葛”呀！
（众人四处逃窜）
多隆（畀独臂神尼紧追不舍）：我明明扮咗女人架！做咩追我呀？
韦小宝：你衰在成碌葛噉吖嘛，唔追你追边个得架？
阿南：师父！
吴应熊：趁佢哋乱晒龙，我哋快啲走！
（阿南揦起把剑摆喺吴应熊胸前）
阿南：师姐，你噉样走师父会怪你架。
（阿珂点阿南穴，阿南晕低。）
吴应熊：你跟我走啦！我一定唔会辜负你！嚟吖！
（龙儿协同四护法杀到嚟）
一护法：恭迎教主法驾！
龙儿：老尼姑，快啲交世子同韦小宝出嚟！
一护法：你唔交出嚟，我哋入嚟架喇！
韦小宝：啊？又边瓣人马呀？
多隆：话之佢边瓣呀！出去顶住先！
龙儿：四护法，退下！（两三下搞掂咗班友）
一护法：我哋捉韦小宝个奸贼先。
韦小宝：又系我？（见到多隆嘅眼神诡异）你只眼神咁无良嘅！你想点呀？
多隆：喂！韦大人，我唔系噉睇我吖嘛？我义气干云，对你嘅景仰有如滔滔江水连绵不绝。
（多隆押住韦小宝出门）
多隆：又有如黄河泛滥，一发不可收拾。
韦小宝：死仔，重讲？！你卖友求荣，冇义气！
*多隆：唔系哩，韦大人，一个死好过两个死呀！最低限有我同你拜山吖嘛。（同龙儿讲）老友，冤有头债有主。你要嘅人我同你带咗出嚟呀。
韦小宝（惊诧）：啊？你做乜扮女人呀？乸型！
一护法：大胆！见到神龙教主重唔下跪？！
韦小宝：做咗教主都唔使扮女人啫！
龙儿：韦小宝，我讲过一定会返嚟揾你嘅！你唔认得我喇？神龙教圣女龙儿！
韦小宝：吓？！系你？你整容嚟呀？
龙儿：呢个至系我嘅庐山真面目！
韦小宝（行近龙儿身边）：哦，你家阵时好样好多！喂喂喂！系咪好样过以前呀？
多隆：系呀！系呀！
韦小宝：既然大家识得嘅，二口六面讲清楚冇事啦。多隆，我哋走嘞！
多隆：喂！先生，你两个识咋㖞！我唔识你架㖞！教主！走先！
韦小宝：哗！你玩到咁尽你？！
多隆：冇乜特别呀！（松人）
韦小宝：喂！
龙儿（搭住韦小宝膊头）：老尼姑同世子呢？
韦小宝：啱嘞！冤有头债有主，佢响上便咋！上去揾佢吖！
独臂神尼：好大碌呀！（飞出客栈）
（龙儿畀独臂神尼咬伤只脚）
（龙儿带小宝走）
（龙儿喺小溪边冲洗伤口）
龙儿：唔好嘈！再嘈就割咗你条脷出嚟！
韦小宝：我靠条脷揾食架㖞，你即系赶绝我啫！
龙儿：你再行多一步，我就斩咗你对脚！
韦小宝：神尼你又要斩，我你又话要斩。你究竟帮边便架？
龙儿：我同你系私人恩怨，你喺宫中坏我大事，重想置我于死地！
韦小宝：喂！嗰次系皇帝话要放箭射你！唔系我㖞！冤有头债有主，系咪噉讲呀？关我乜嘢事得架？！
龙儿：你过嚟！
韦小宝：嚟紧！当我讲错啰。你究竟想点呀？
龙儿：扶我起身！
龙儿：你做咩呀？
韦小宝：扶你吖嘛。
（龙儿伸出只手）
（龙儿企唔稳）
韦小宝（嗍龙儿身上啲气味）：好香架㖞！
（龙儿推开韦小宝）
韦小宝：话你香都唔钟意呀？唔通话你臭好咩！
龙儿：如果你扶我返神龙教，或者我可以放你一条生路！
韦小宝：多谢！多谢！噉行啦！
韦小宝：估我唔知呀，其实你系帮平西王吴三桂做嘢嘅哩！
龙儿：平西王爷对我哋恩重如山！
韦小宝：喂喂喂！你点知佢对你恩重如山呀？
龙儿：关你咩事呀？我师父讲嘅！
韦小宝：喂！你师父老点你唔得架！
龙儿：咩叫老点呀？
韦小宝：即系呃你。
龙儿：你会唔会老点你老窦吖？
韦小宝：会！睇吓有冇着数吖。
龙儿：如果有着数呢？
韦小宝：点到佢慌呀？
龙儿：贱格！（ung2韦小宝落水）
韦小宝：死八婆！迟早滚你上床，滚大埋你个肚！
龙儿：讲咩呀？行快啲！
路人甲：你睇，呢只老虎咁瘦嘅？
路人乙：唔系老虎！系骡仔嚟架！
韦小宝：汪汪汪！
路人甲：哗！原来系哮天犬嚟架，走呀！走呀！走呀！
（神龙教基地）
一教众（把刀架住韦小宝喉咙）：走去边呀？返埋去！
一教众：启禀教主！平西王世子同平西王特使冯锡范老先生等候多时。
龙儿：有请！
吴应熊：教主，喺客栈多谢相救，小王先能够脱离老尼姑嘅魔掌。
龙儿：世子噉讲法，系咪讽刺本座唔够老尼姑打呢？
吴应熊：教主太言重嘞。父王近日起兵在即，有感神龙教近年来帮助本藩招兵买马，训练人才，大大有功！先叫冯老师陪同小王，赐御酒畀教主，并封教主为护国圣女！
龙儿：谢平西王爷！
吴应熊：赐酒！
冯锡范：老夫上次有要事在身，未能陪世子上京。劳烦教主辛苦！先敬一杯。
龙儿：好！（一饮而尽）
韦小宝：有古怪！
冯锡范：哈哈哈！好酒量！素闻神龙教神龙素女功，一代传一代，百毒不侵，功力精纯。唔知有冇噉嘅事？
龙儿：区区素女功，何足挂齿呢？
冯锡范：我都想知道，神龙素女功可唔可以抵挡天下第一奇毒，冇色冇味嘅“奇淫合欢散”！
龙儿：冯锡范！系咩意思呀？
冯锡范：哈哈哈！神龙教恃功自大，横行无道！王爷一早睇你唔顺眼！下令要将你哋全教铲除！一网打尽！
龙儿：人嚟！捉住佢哋！（四护法枪头对内）
龙儿：你以为噉样就可以对付我嘞咩？
（冯锡范奸笑）
（龙儿感不适）
吴应熊：你返嚟之前，我哋已经攻陷神龙教，而家所有嘅教众都效忠我哋。冥顽不灵嘅已经全部处死。
冯锡范：龙儿，我走遍天下先至揾到呢只可以破你神功嘅“奇淫合欢散”放喺酒里便。而家你系咪全身发热呀？天光之前，一定要揾到个男子交合。如果唔系就会全身喷血而死！老夫或者可以帮你一个忙嘅！
四护法：教主，我嚟救你！
（龙儿喺四护法掩护之下遁去）
吴应熊：哎，师父，你武功已经咁高嘞！嗰八成功力不如益我啦！
冯锡范：世子，你——
吴应熊：哎，噉系吖嘛。
韦小宝（拖住只马）：乖乖哋，帮帮忙！行啦！
（龙儿抓住韦小宝）
龙儿：神龙血遁大法！
（龙儿使出神龙血遁大法，得以脱身）
（龙儿行行吓路行唔喐，摊咗落地下）
韦小宝（回头）：唉，见你个人冇乜点啫，好请消夜添呀！嗱，扶埋你嘞，你冇嘢吖嘛？！
*龙儿：我用咗最后一道真气使出“神龙血遁大法”，而家毒气攻心。
韦小宝（踎低身）：帮你捽吓心口嘞！
龙儿：你唔好豆我！行开！
*韦小宝：算数！（起身）大枝嘢啦你，话咗有着数，老窦都有权点你架啦！家阵系得我一个冇点你咋，你重好心着雷劈！
龙儿：你唔好走呀！
韦小宝：做咩呀？
龙儿（心谂）：呢个人虽然讨厌，估唔到讲嘅都系真说话。我神龙教对平西王忠心耿耿，到头来都系遭灭教之祸。（趴喺地下）唔通我真系咁命苦，要死喺呢度？（将韦小宝睇成贾宝玉）贾宝玉？！（整理衣装）你过嚟吖。
韦小宝：咩呀？又叫我走，又叫我过嚟，你想点呀？话实嘞！
龙儿：快啲过嚟吖。
韦小宝：唔通想揾我解毒？！唔系噉嚟益我吓哗？！蜘蛛精呀！（吓到飞起）
（龙儿将韦小宝卷入自己所结嘅茧入面）
龙儿：韦小宝，呢啲或者系天意。如果他日你有负我嘅，我一定唔会放过你！
（第二日）
韦小宝：你醒咗喇？
龙儿：我都冇瞓过。小宝，而家我已经系你嘅人，以后你想点我都会照做架。
韦小宝：噉唔该你递返条裤畀我先。（龙儿照做）
韦小宝：真听话。（破茧而出）哗！天光嘞㖞！
龙儿：小宝，你过嚟吖。
韦小宝：咩啫？
龙儿（依偎喺韦小宝身上）：以前个个都话我知，吴三桂系个英雄，系个好人。我而家至知道，英雄未必系真嘅。
韦小宝：我都系而家至知道，原来你系靓得咁交关嘅！好肚饿，揾啲嘢食先！（跳上樖树，又落返嚟）发生咩事呀？
龙儿：你已经有咗我嘅八成嘅功力，身怀绝世武功嘞。
韦小宝：我身怀绝世武功？！
龙儿（岌头）：本门武功，一定要处子之身修练。一失童贞，功力嘅八成就会同时输入男方体内。而家我得返两成功力咋。
韦小宝（面露喜色）：咁犀利？！我想舂你两槌试吓力，你介唔介意？
龙儿：啊？
韦小宝：讲笑啫，我点舍得呀？
龙儿：而家你同我好咗之后，你就系神龙教嘅圣王！有责任为教众报仇雪恨！
韦小宝：揾边个报仇呀？
龙儿：吴三桂同冯锡范。
韦小宝：呢两个唔使你讲我都会揾佢哋。
（栖凤楼）
多隆（喊咁口面）：韦大人呀！韦大人呀！
建宁：喊咩先得架？！重唔快啲讲？唔讲我杀咗你！
多隆：公主，我得返韦大人呢个黄纸兄弟！我哋兄弟之情有如滔滔江水连绵不绝。就喺嗰晚……
建宁：嗰晚点呀？
多隆：我一个人打百几人都保佢唔住。个妖女一手揦住佢，左手拉住佢右脚，右手拉住佢左脚，重拧甩埋个头呀！
*建宁：佢咪即系死咗？！
多隆：系！系！
建宁（唱）：吓得我腾腾震呀！
建宁：震到我入心呀！
多隆：公主，点解突然间咁好雅兴架呢？
建宁：唉！你唔明，只有我同韦大人先至明。
多隆：公主，我明唔明唔紧要，只要系韦大人嘅手尾，我都好乐意啃嘅。
建宁：唔使你啃，自然会有人啃。你出去罢啦。
多隆；系！公主！
（多隆出建宁间房）
（几个大臣等候紧佢）
众大臣：参见多大人！
多隆：免礼！
众大臣：谢大人！
某大臣：多大人，卑职等今晚喺官邸设宴。希望公主同大人赏面光临。
多隆：韦大人惨遭不幸！我哋都冇心机食啦。折现啦！
某大臣：卑职遵命！
多隆：韦大人精忠报国杀身成仁，我哋一定要同佢风光大葬，你预备啲金缕衣呀，金盆洗手呀，金……
某大臣：系！卑职即刻揾一流师傅制造。
多隆：都系唔使麻烦嘞，折现啦。重有，韦大人生前就最钟意美女嘅。万一佢报梦嚟揾我，我都唔知揾咩陪佢。所以揾定十个八个美女陪我瞓喇！
某大臣：多大人真系想得周到。韦大人泉下有知一定会好感动。
多隆：应该嘅，不过我为人咁正经，有成十几个美女陪我瞓觉，好难为我啫！
（众大臣厥倒）
多隆：做咩呀你哋？
众大臣：冇事！冇事！
多隆；不知何年何月得偿所望，得得得偿所望……得得得偿所望……
韦小宝：你对得我住呀，多隆！
多隆：得……得偿所望……
（韦小宝奋力冚咗多隆一巴）
多隆：啊？！韦大人，真系天开眼嘞！你冇死到呀？哎呀！我得偿所望！
韦小宝：识着你噉嘅朋友，我点舍得死呀？
多隆：系呀！系呀！系呀！韦大人！
韦小宝（拍膊头）：你都算够义气呀！
*多隆：韦大人，想当日我押咗你出去之后，我返嚟晚晚都瞓唔着，晚晚都垂泪到天明！净系记得两个字，而我就刻咗喺手臂度！警惕自己！
韦小宝：咁隆重？！边两个字呀？
多隆：你自己睇啦！（伸直手臂）
（韦小宝撩开多隆嘅衣袖，多隆嘅手臂度写住：布仇。）
韦小宝：布仇？！
多隆：冇错。卑职读得书少，唔知有冇写错字。
韦小宝：应该就冇。
多隆：呢两个字就系我日思夜想为大人做嘅。就系报仇呀！
韦小宝：哗！啲血重吧吧声噉流，唔会系正话先雕上去架啫吓哗？
*多隆：哦，唔系，雕就雕咗好耐呀！（揦起把刀仔）不过每一次兴奋呢佢就流架嘞！而家见到大人呀，当然系兴奋啦。噉佢就流啰。
韦小宝：你揦住把刀，又咩因由呀？
*多隆：点会有把刀架？！边个？边个摆喺我手度？（抌咗把刀仔）
韦小宝：我明！多隆你果然系我嘅好兄弟，不枉我当日同你烧黄纸呀。
多隆：大人明就好啦。
韦小宝：唔争在话多个秘密你知！
多隆：我好守得秘密架！
韦小宝：其实我系皇上派入天地会嘅反卧底。目的系接近陈近南。根据情报所得，原来天地会嘅人遍布全国，就连云南呢度都有佢嘅分舵！
多隆（半信半疑）：真嘅？
韦小宝：所以我想多隆你今次代替我出去走一趟！
多隆：啊？！我？！
韦小宝：你而家嗱嗱声行出街市，然之后呢就大嗌暗号！自然会有人带你入去天地会嘅分舵！
多隆：咩暗号呀？
韦小宝：反清复明！（多隆仆倒）
多隆：咁大逆不道嘅嘢都讲得呀？
韦小宝：哎！同反贼联络，梗要用反贼嘅暗号架嘛！我重要喺你背脊度雕多个特别暗号添呀！
多隆（弹起身）：重有？
韦小宝：有！嗱，你阵间入到天地会，将会见到一个化装成为朝廷大官噉嘅人，嗰个就系陈近南嘞！你畀个特别暗号佢睇，佢就会交样嘢畀你。
多隆：咩嚟架？
韦小宝：系……秘密！
多隆：哦！
建宁（开门）：你哋咪嘈住我唱歌先得架！
韦小宝（翕手）：公主！
（建宁厥倒）
（多隆十吓十吓噉行出街市）
多隆（细声同路人讲，路人即刻走夹唔唞）：反清复明！
多隆（细声同路人讲，路人即刻走夹唔唞）：反清复明！
多隆（细声同路人讲，路人即刻走夹唔唞）：反清复明！
多隆（纳闷）：噉嘅？！
多隆（畀人ung2落地，见到“天地會分舵”嘅木牌）：天地会分舵？！唔系咁明目张胆吖嘛？
（多隆企返起身，又畀人ung2落地，见到只马骝拎住“天地會分舵”嘅木牌）
多隆：马骝都知？！
（平西王府）
*吴三桂：韦小宝居然到咗昆明！呢个人蛊惑多端，唔可以轻视！
吴应熊：父王！韦小宝三番四次羞辱孩儿，如果唔将佢凌迟处死，难消我心头之恨！
吴三桂：你都懵嘅！佢而家系钦差大臣，杀咗佢就等于系造反！何况我哋嘅兵马粮草要一个月先至齐。点可以为咗个小小嘅私人恩怨，就误咗大事！（走开）
冯锡范：冇错嘞，世子！他日兵临城下，我哋将韦小宝斩成肉酱，都只系举手之劳，何必急在一时呢？
吴三桂：你而家假假哋都系驸马，得闲去见吓公主！氹吓佢！而我哋呢就假意筹备婚礼，等康熙呢个小鬼完全唔提防我哋有反意。明白未？
吴应熊：孩儿明白！
吴三桂：冯老师，广东有密使嚟，同我倾出兵嘅事。我唔想有咁多耳目，你同我撤走后院大部分嘅侍卫！
冯锡范：领命！
（平西王府门口挂住“天地會分舵”嘅牌子。）
*多隆（见到牌子）：咁出位？！打正招牌都得呀？（行入去）门都冇闩嘅？！唔怪之天地会唔够我哋朝廷斗啦。反清复明！反清复明呀！反清复明！
吴三桂（睇紧书）：边个喺度发噏疯呀？（走出去睇个究竟）
多隆：反清复明！
吴三桂：边个咁大胆呀？（撞到多隆，吓咗一跳）你系边个？
多隆（上下打量）：化装得几似㖞！成个朝廷命官噉。派你做卧底呀？暗号？
吴三桂：咩？咩暗号呀？
多隆：反清复明吖！
吴三桂：大胆！人嚟！
多隆：喂！喂喂！我自己友嚟架，我有暗号写咗喺身架。（除衫）
吴三桂（读多隆背上啲字）：反清复明？誓杀吴三桂？
多隆（拧转身）：而家你知我咩料吖。
吴三桂：我知你老母！（舂咗多隆一拳）
多隆：冚家铲！有暗号都打？！（舂返吴三桂一拳）
吴三桂：冚家铲！你还拖？！人嚟！有刺客！
多隆：哈！我你都敢打？！
吴三桂：有刺客！人嚟呀！
吴三桂啲手下：捉住佢！
多隆：死未？（打退咗几个手下，摆甫士）
多隆：平时唔多打你当我流架吓哗？即管放马过嚟！
吴三桂：同我打！（多隆惨遭群殴）
多隆：攞命咩？
吴三桂：等你反清复明吖嗱？！同我打！打到佢老母都唔认得！
多隆：反清复明！
一手下（回报）：禀告王爷，建宁公主由钦差韦大人陪同，突然驾到。
多隆：打死人咩？反清复明！反清复明！……
吴三桂（入屋）：不知公主驾到，有失远迎！平身！
韦小宝：公主都就嚟叫王爷做老爷咯，正所谓……（见到王爷黑晒左眼）王爷，你只眼？
吴三桂：哦，我啱啱唔小心撞到啫。人嚟，同我传世子！
多隆（冲入嚟）：救命呀！救命呀！救命呀，韦大人！救命呀，韦大人！
韦小宝：贵姓呀你？
多隆：我系多隆呀！我系多隆，韦大人！
韦小宝：乱讲！多隆边有你咁靓仔！
吴三桂：同我拉呢个反贼去石室！
手下：系！
多隆：唔好呀！
韦小宝：梗要啦，呢啲！
*多隆：韦大人！喂！你唔记得我同你去叫鸡咩？
韦小宝：你真系多隆？
多隆：系呀，大人！
吴三桂：呢个人冲入我平西王府！重大声叫咩“反清复明”咁大逆不道嘅口号，就系反贼！
韦小宝：唔系㖞，佢真系多隆㖞！大人，因何事殴打朝廷命官呀？
多隆：系呀！
吴三桂：佢系朝廷命官？
韦小宝：系！
多隆：梗系朝廷命官啦！
吴三桂：就算系朝廷命官呀，口出叛逆之言都系杀头嘅大罪呀！
韦小宝：但系佢自己都系满人，冇理由反清咪即系反返自己？
多隆：系呀！系呀！
韦小宝：多隆，你系咪畀人冤戾你呀？
多隆：系呀，系呀，大人！我畀人冤戾呀！大人！
吴三桂：重话我冤戾你？！你睇吓佢背脊纹咗咩字。
韦小宝：睇过。
（韦小宝除咗多隆件衫，将啲白色粉末抹喺多隆背脊上面，抹走咗啲字。）
韦小宝：冇咩嘢吖，花咗一笪咋㖞！
吴三桂：哦，系你抹咗！啱啱系纹咗“反清复明誓杀吴三桂”嘅。
多隆：哦？！
韦小宝：王爷，你噉即系想冤戾埋我啫！
建宁：小宝，你点可以对王爷咁冇礼架！
韦小宝：系！
建宁：不如等我讲句公道话好吗？
吴三桂：愿听公主高见！
建宁：噉就梗系王爷你……唔啱啦！（吴三桂打咗个突）多隆系钦差大臣，负责带呢把尚方宝剑，沿途保护哀家。如果佢用呢把*“上斩昏君，下斩谗臣”嘅尚方宝剑嚟对付王爷你！噉就连哀家都冇法子架嘞！
多隆：系㖞！（抽出尚方宝剑）边个冚家铲正话打我？系你！
吴三桂：喂喂喂！你唔好乱嚟呀！
多隆：系你打成我噉嘅！
多隆，冤有头债有主，边个打你，你斩嗰个好喇！
吴三桂：你唔好乱嚟呀吓！
多隆：我攞你命！
吴应熊（揦住免死金牌出现）：免死金牌在此！尚方宝剑都唔斩得！阿爹，你唔记得有免死金牌咩？
韦小宝、建宁：吓？！免死金牌？！
多隆：免死金牌？！
吴三桂：哗！系㖞！争啲唔记得先帝御赐嘅免死金牌㖞！（将免死金牌摆喺胸前）斩呀！斩呀！斩呀！斩呀！
多隆（连连后退）：真系唔斩得？
韦小宝：有金牌喺手真系唔斩得！不过冇喺手嗰啲就……
多隆（恍然大悟）：哦！
吴应熊（抢过免死金牌）：父王，借嚟使吓先！（撇）
吴三桂：喂喂喂！阿仔！哗！（撇）
吴三桂（同吴应熊争免死金牌）：畀我啦！你走得快，你走先啦！
吴应熊：唔系哩，你系平西王，佢唔敢斩你架！
吴三桂：唔系哩，你畀我先啦！
吴应熊：唔得呀！畀我吖！
吴三桂：喂喂喂！畀我吖！
多隆：唔好玩呀！你想我斩边个呀？
吴应熊：畀我呀！
多隆（转身，见到门口几个人头先都有份打自己）：哦，你哋冇金牌！正话打得好过瘾哩！死呀！死呀！（几个人过去争抢免死金牌）
吴应熊：畀我！
吴三桂：畀我！
吴应熊：畀返我！畀返我！
吴应熊：喺度！喺度！（吴应熊抢过免死金牌，塞入自己件衫里面）
吴三桂：阿仔，畀返我！畀返我！喂喂喂！阿仔！喺边度？
吴应熊：个金牌呢？个金牌呢？
韦小宝：喺里便！（手指吴应熊嘅下体）
（众人齐齐攻击吴应熊下体）
（建宁执起免死金牌）
建宁：喂！个金牌喺呢度呀！
众手下：对唔住！对唔住！对唔住！
吴应熊（惨叫）：哎呀！
吴三桂：阿仔，你点呀？
建宁（畀返个金牌吴三桂，走去吴应熊身边）：驸马，你点呀？人嚟！
手下：有！
建宁：快啲扶驸马休息！
手下：喳！
建宁（眼仔睩睩）：我去睇吓驸马点先。
（吴应熊间房）
建宁：呢度冇事嘞，返出去呀！
手下：喳！（走晒）
（吴应熊呻吟不止）
建宁：驸马，你见点呀？
吴应熊：好痛呀！
建宁：好痛呀？噉点算呀？不如我帮你睇吓。
吴应熊：唔系几好嘅！
建宁：傻啦，我哋都就快系夫妻咯！嚟呀！我帮你睇吓。（一只手揵开吴应熊嘅裤，另一只手揸住把刀仔。）
（另一边厢）
吴三桂：你唔好乱嚟呀！嗱，我有免死金牌喺处架！啊！你唔好乱嚟呀！
*多隆：
韦小宝（充当架梁）：哎！哎！哎！多统领，人谁无过呢？唔打都打咗咯，不如就赔返多少汤药费算数啦！
吴三桂：好！好！好！
*韦小宝：横掂打得唔系好伤！就赔返五十万两哩？
多隆：唔伤？！
吴三桂：咩？咩？咩？咩话？
韦小宝：噉当我冇讲过啦！继续！
吴三桂：喂喂喂！畀！畀！畀！畀啰！畀啰！（屋外突有爆炸声，几个人走出去睇情况。）
韦小宝（揦起金刀）：金刀玉玺？！
吴三桂：唔系，唔系，我……我唔知架！
韦小宝（读皇袍上面啲字）：吴公三桂天命所归，反清夺位即日登基。金刀为记，玉玺为凭？！王爷，你？！
*吴三桂：唔关我事架，分明系有人嫁祸畀我架咋！我绝对冇谋反之意架！（传出吴应熊嘅惨叫声）对唔住呀！
（三日冲入吴应熊间房，见到吴应熊喺张床度揞住自己嘅私处，痛到反艇噉嘅样，建宁就匿埋喺角落头。）
建宁：我好惊呀！
吴三桂：阿仔！
韦小宝：公主！
吴三桂：阿仔，你见点呀？阿仔！阿仔，你见点呀？阿仔！
韦小宝（问建宁）：点解会噉架？
建宁：佢，佢想污辱我，我咪顺手攞起把刀，割咗佢啰。我好惊呀！
韦小宝：世子你实在太唔识谂嘞！公主迟早都系你嘅人嚟啦！你何必急在一时呢？而家搞成噉你叫我点交代得架？
建宁：我好惊呀！
吴三桂：你哋！
韦小宝（耳语）：做得好！
建宁：跟你学吓嘢啫。好惊呀！
吴三桂：人嚟！
手下：老爷！
吴三桂：公主受惊，送公主返栖凤楼休息。
手下：喳！
建宁（抌咗把刀）：好惊呀！
吴三桂：韦大人，出咗啲噉嘅事，系三桂家门不幸。恕三桂招呼不周！
韦小宝：今日发生咗咁多唔应该发生嘅事。如果我系你，我都唔知点算好呀！公主，走！
建宁：好惊呀！好惊呀！我好惊呀！我好惊呀！
手下：老爷，少爷未醒。
吴三桂：召冯老师返嚟！
手下：系！
吴三桂：下令三军戒备！
手下：喳！
冯锡范：参见王爷！
吴三桂：应熊点呀？
冯锡范：世子性命无碍，但系要害受创甚深。恐怕以后生儿育女都成问题。
*吴三桂：岂有此理！康熙呢个小子，居然派佢个妹同韦小宝嚟绝我吴家后代？！好！我要报仇！你即刻招集人马，挥军北上！
冯锡范：王爷息怒！我方粮草未齐，兵员未足！如果贸贸然出兵，恐怕胜算不高。最好暂时忍让，半年之后……
吴三桂：我叫你出兵就出兵！而家你系王爷抑或我系王爷呀？
冯锡范：卑职不敢！
吴三桂：你带齐人马同我去围攻栖凤楼！将建宁呢个贱人同埋韦小宝碎尸万段！
（栖凤楼）
韦小宝（吟唱《帝女花》）：落花满天蔽月光，借一杯附荐凤台上。
建宁：真系诗意嘞！
韦小宝（斟酒）：公主，请酒！
建宁：无事献殷勤，非奸即盗，有咩事呀？
韦小宝：公主你实在疑心太大嘞！我只不过系想介绍位姊妹过你认识啫。龙儿！（龙儿行落楼梯）
建宁（以为佢系男人）：哎呀！（抌咗酒杯）乜你呢家嘢架？你以后唔好掂我！
韦小宝：你误会咗嘞！佢系女人嚟架！嗱，你哋以后大家做埋姊妹，就开开心心啦！
建宁：你就想呀！想创你个心呀！佢咩新丝萝卜皮呀？想同我争老公，一人一半？好难呀！
韦小宝：当然唔可能一人一半啦，你只系占四分之一咋。双儿！（双儿行落楼梯）
建宁：哦，我都估到你哋有路架啦！
韦小宝：大丈夫三妻四妾系好平常嘅。而家我数埋得三妻一妾，经已极度冇面架嘞！
建宁：想烂你嘅肺呀！嗰两只乌啄啄想同我平起平坐？！唔得！
韦小宝：绝对冇可能平起平坐吖！佢哋三个系妻就你系妾！佢哋坐时就你要企！我哋瞓时就你负责冚被！
建宁：被吖嗱！（舂咗韦小宝一槌）
韦小宝：讲过唔好打面架嘞嘛。
建宁：面吖嗱！
龙儿：做妾侍喐手打老爷，太唔成体统嘞！大双妹，小双妹，你哋去教训吓佢！
建宁：咪住！你哋够胆以下犯上？！（躽胸凸肚）好呀！打呀！呢个就系韦家嘅骨肉！打呀！够胆就打我喇嘛！
（双儿无从入手）
韦小宝：望咩啫？韦家骨肉梗系唔打得啦。唔好打佢个肚呀！舂佢心口好喇！
建宁：救命呀！救命呀！
多隆（拦住双儿）：咩事呀公主？唔使惊！有我忠肝义胆嘅多隆喺度！
建宁：佢哋虾我！
龙儿：多隆，我呢一掌叫神龙分尸掌，中咗就会四分五裂而死！你钟意嘅就即管企喺度啦！我数三声！
建宁：唔使理佢！（多隆运气）
龙儿：一！
（多隆吓到跳上二楼）
韦小宝：哗！几时变得咁好轻功架？
龙儿（问建宁）：噉你做唔做妾侍呀？
建宁：做妻得唔得呀？
龙儿：好！以后你就叫我做大家姐，佢哋系二家姐，三家姐。我同你起个名叫做带子！希望你同相公生返个仔呀！
建宁：带子咁肉酸！
韦小宝：鲍鱼喇，啱唔啱呀？
建宁：鲍鱼？都好啲！
陈近南（从天而降）：乜咁早食饭？
韦小宝：师父！
双儿：叩见总舵主！
韦小宝（跪拜）：师父，你嚟咗呀？等我嚟介绍！呢个系神龙教嘅龙儿，而家弃暗投明跟咗我。大小双儿你识架喇吓。（建宁弹过嚟）呢只鲍鱼！我哋坐低至讲！嚟呀！
陈近南：我查到冯锡范已经采取行动，呢个人非常之狡猾。而且武功不在我之下，我怕你应付唔嚟！
韦小宝：边个冯锡范？我连佢条毛都未见过！但我经照你吩咐，将吴三桂平西王府上下搞到鸡犬不宁！相信佢好快脆忍唔住就会作反！
陈近南：的确好快，佢今晚就会嚟到栖凤楼。而且话要将你生擒捉返去，剥皮处死！
韦小宝：哈！佢只不过系危言耸听！弟子唔怕！多隆，同我准备一匹最快嘅马，我有事走先。
陈近南：我睇佢哋即刻就会起兵作反。尤其是建宁公主，佢哋一定会捉你作为人质。
建宁：噉点呀？
陈近南：小宝，畀公主先撤退，离开昆明。
龙儿：总舵主，请你调配我哋吖。
（韦小宝送行）
建宁：小宝，你小心啲。你唔顾个大，都顾个细。
韦小宝：放心啦，大细都顾！你行先。（建宁入轿）
陈近南：小宝，你都系即刻同龙儿走先。呢度等我押后得嘞。
韦小宝：师父！
陈近南：小宝，你好聪明！喺而家呢个噉嘅乱世嘅时候，只要你唔贪图荣华富贵，一定可以推翻满清，恢复我哋大汉嘅江山！
韦小宝：系就至好啦。不过弟子有啲嘢硬系唔明。
陈近南：你讲吖。
韦小宝：自从康熙登位之后，四海升平。尤其是鳌拜死咗之后，更加系国泰民安！人人食得好，着得好！点解系都要推翻佢呢？
陈近南：因为呢个系我毕生嘅志愿。
韦小宝：啊！系㖞。不过，为咗你毕生嘅志愿，就要打仗，要人民受苦，会唔会有啲……
陈近南（发嬲）：而家唔系争论嘅时候！
冯锡范（大笑）：哈哈哈！陈近南！你食古不化，就连你徒弟都唔信你！
陈近南：冯锡范！退后！
（冯锡范六弟子从天而降）
陈近南：师兄，咁耐冇见！估唔到你做咗人哋嘅走狗！
冯锡范：做有钱人嘅狗，好过做挨饿嘅穷人。咁简单，你都唔明？
龙儿：你无耻！
冯锡范：六合大法！
（龙儿败阵）
冯锡范：你功力差咗咁多！龙儿，究竟畀咗边个？
韦小宝：僆仔，你睇住我喺度都够胆打佢？
韦小宝：唔系呀哗？呼啦圈都谂住攞嚟杀人？
韦小宝：哗！重有？！喂！好咯㖞！重嚟？哎！唔玩嘞！（将啲呼啦圈送返出去，冯锡范六弟子皆倒）
韦小宝（女人声）：哗！真系咁犀利？喂！喂！喂！噉嘅？
陈近南：你全身都系真气，但系散乱不堪。你根本控制唔到。
冯锡范：原来佢啲功力畀咗你！
韦小宝：系呀，吹呀？
陈近南：小宝，龙儿受咗伤，你带佢走先。
韦小宝：师父，你一个人掂唔掂呀？
陈近南：你都掂，我唔掂？
韦小宝：呀，噉呀系，走先！
陈近南：剑阵！
冯锡范：六合挪移大法！
（厮杀）
冯锡范：师弟，当年你喺师父面前讲我坏话，等我被逐出师门。今日就系你嘅报应！
陈近南：当日师父叫我清理门户，我后悔一念之仁冇一剑将你杀死。
冯锡范：系噉，只好怪你自己蠢啦。
（陈近南亲自出马）
（陈近南同冯锡范厮杀，不幸畀冯锡范劈咗只手臂落嚟。）
冯锡范：师弟，估唔到你今日败喺我嘅手上！
陈近南：你要杀就杀，无谓多讲。
冯锡范：我点舍得杀你呀？我嘅功名富贵，全部喺你身上！
（树林）
韦小宝：小心呀！龙儿，你顶住呀！
（起沙）
龙儿：你点呀？
韦小宝：冇！（眼泪盈框）
龙儿：小宝，我只系受咗轻伤啫！你使乜咁伤心啫？！
韦小宝：系，感情丰富不留都系我嘅缺点嚟！
龙儿：傻啦，呢啲点会系缺点啫？！你重有好多长处架！
韦小宝：傻啦，我长处只得一度架咋！
（独臂神尼捉住阿珂、吴应熊失惊无神噉出现）
韦小宝：唔该，下次出现可唔可以单声先呀？
独臂神尼：唔系弗咗一声嘞咩？！你听唔到呀？（见到龙儿）韦香主，佢……
韦小宝：龙儿而家系我内人。
独臂神尼：你有本事连佢都收服埋？！
韦小宝：好难讲架！好多嘢你哋师姑唔明架噃！
独臂神尼：高人行事，高深莫测！
韦小宝：咦喂！你点会捉到佢两个架？
独臂神尼：吴三桂个老贼挂住调兵遣将，疏于防范。叛徒阿珂匿埋喺平西王府入便！所以我将佢哋捉返嚟！重有一本《四十二章经》。
韦小宝、龙儿：《四十二章经》？！
韦小宝：收埋先！（接过《四十二章经》）呢本经对我哋反清大业非常重要。多谢神尼！
独臂神尼：韦香主，噉佢哋呢？点样处置佢两个呀？
韦小宝：呢对狗男女，人人得而诛之！（神尼正欲喐手）不过噉，如果佢肯带罪立功嘅话，我就即管畀个机会你……（指住阿珂，吴应熊埋去企喺阿珂前便）
吴应熊：多谢韦大人！
韦小宝：……死先！（手指吴应熊）你呀！冧佢！
吴应熊：大人，饶命呀！（匿喺阿珂身后）
阿珂：我哋决定一齐死！
吴应熊：喂！你自己决定！我冇话系呀！韦大人，你放过我条狗命啦！我愿意为你做牛做马！
阿珂：你使乜咁惊佢哋啫？！你话过同生共死永不分离架嘛！
吴应熊：喂！我讲吓架咋㖞。你唔系咁认真吓哗？！
阿珂（饱含泪珠）：你同我讲啲噉嘅说话？
吴应熊：我而家已经系太监，你要我嚟做乜嘢啫！你唔好连累我添呀！
（阿珂哭泣）
韦小宝：咳呀！你喊乜鬼嘢啫？好心你啦！（搭住阿珂膊头）
阿珂：躝开！狗贼！
韦小宝：哗！你做人嘅嘢你噉样讲嘢？我做到噉样你都唔咩我，佢噉样样，你反而咩佢？！喂！你系咪噉呀你呀？
龙儿：小宝呀，到底你讲乜嘢呀？
韦小宝：冇嘢。一于跟我返去，日头服侍夫人，夜晚服侍我！
独臂神尼：好彩韦香主收容你咋！如果唔系，我就杀咗你清理门户！重唔快啲多谢韦香主？！
吴应熊：系咯，重唔多谢韦香主？！多谢韦香主不杀之恩！多谢韦香主执埋我手尾！
阿珂（伸吴应熊一脚）：无耻！
韦小宝（扇吴应熊）：贱格！
吴应熊：打得好呀！
韦小宝：你都系！（不忍落手）打在你身，痛在我心！（走去龙儿嗰便）
（阿珂破涕为笑）
龙儿：又畀你呃咗个女仔嘞！
韦小宝：揾食啫。喂！畀吓面啦！夫人大量，小人感激。
（御书房）
韦小宝：微臣韦小宝叩见皇上！
康熙：平身！小宝，你快啲过嚟！
韦小宝：谢皇上！（入御书房）
韦小宝：微臣好挂念皇上。皇上最近身子好吗？！
康熙：好！有
